Ignis

Unang sulyap pa lang ay batid ko na

Ikaw ang papawi sa lamig at pangungulila

Kaya sana'y tupdin yaring pagsusumamo

Nitong nagyeyelo kong pagkatao at puso

Sa init mong taglay ako ay nahalina

Ang nais kong liwanag sayo'y natamasa

Sa taglay mong lagablab ako'y nasasabik

Kahit pa ako'y mapaso, sayo ako'y magbabalik

~and on that note, I shall now end this obsession with le gorgeous neighbor.

Luna

Kulay dilaw

Abot langit ang tingin

Iihip ang hangin

Saka ako’y mapupuwing

Lalabas ang luha

Hindi sinasadya

Kay lawak

Kay ganda

Hindi na mapipikit

At saka tatangis

Ngayon ko lang

Nasilayan ng ganyan

Waring may sinasabi

Siya ba o ang tibok mo?

Ayoko ng ganito.

Ang itim na tahimik

Kay lungkot tulad ng dati

Walang katabi

Wala ang mga bituin

Pumapaimbabaw,malungkot pa rin

Sino ang Masa

Ito ang kauna-unahang kong tula na naisa-publiko gamit ang internet. 
Ito ay naisulat bilang sagot sa kantang "Theme from Noontime Show" ng bandang Itchyworms. Hindi ako sang-ayon sa kanta nila at sawang sawa na akong marinig ang mga taong lagi na lang sinisisi ang masa. At isa pa, peyborit ng lola ko si Willie. Mwehehehe. 
Unang naisulat itong mga tugmang ito noong 2007 sa rakista.com v1 Literature Forums. Nakakatawa lang kasi yung isa sa miyembro ng bandang ito ay mapapanood na ngayon sa isa sa pinakasikat na noontime show sa bansa. ~this is your show, this is your time.~

Sino ang masa?
Ang masa ba ay mangmang?
Ang masa ba ay bayaran?
Siya ba ang dahilan
sa pagkalugmok at kahirapan?

Sino ang masa?
Ito ba ang karamihan?
Kabilang ba ako sa
tinuturing na latak ng lipunan?

Sino ang masa?
Kailan mo masasabing di ka
isa sa kanila?
Kapag ba mayaman ka?
Kapag ba naiiba ang iyong musika?

Sino ang masa?
Sila ang sinisisi
Ngunit ang mga kandidato,
tuwing eleksyon sa kanila kumakampi.

Sino ang masa?
Ikaw.
Ikaw na nandidiri sa kanila.
May nagawa ka na ba para
mabago ang sistema?

Sino ang masa?
Sila ay mga bayani.

Bago sa pandinig hindi ba?
Ang masa ay mga bayani.
Pagkat ano pa ang mas dadakila
sa pagsalo ng masalimuot na bungang
kasaysayan ang may sala.

Masilungan

Ano pa ba ang silbi ng bawat umaga
Kung sa bawat paggising ay wala ka
Kahit sulyap lang sa iyo ay hindi natatamasa
Siguro ito na nga, tapos na.

Hindi ko na ipipilit kung ito talaga ang nakatakda
Kahit hindi naman talaga ako naniniwala sa tadhana
Kung ito ang makabubuti, hahayaan ko na nga
Na magwakas itong ating pagiibigan na akala nati'y di magsasawa

Pagkat iba na ako, iba ka na, iba na ang tayo
Mga pagkakaibang pareho nating hindi gusto
Marahil hindi natin alam kung paano tayo humantong sa ganito
Ngunit kailangan nating tanggapin ang pareho nating alam, kailangan na nating wakasan ito.      

WASAK na WASAK

Wasak talaga..

Chining

Tanda ko pa noon, ikaw ang pantasya

Ng bawat lalaki sa ating probinsya

Pagkat ikaw ay laging may libreng passes sa sinehan

Kung saan ikaw dati ay namamasukan

Mapintog na dibdib at makinis na binti

Ikaw ang pangarap kong maging sa aking paglaki

Ikaw ang palaging pinaguusapan ng mga lasing

Ngunit asan na ngayon ang iyong ningning

Namumuting buhok at kulubot na balat

Malamlam na mata at mga kamay na sa pera ay salat

Bitbit ang isang sanggol na iyak ng iyak

Wala na ang lahat ng iyong halimuyak

Pagbawi

Ang aking pagkatao ay kay tagal ring nawala

Pagkat nilamon ng banyagang wika ang aking dila

Mga huwad na damdamin at hilaw na salita

Ang siyang tumalima sa aking diwa

Subali't ngayon ay aking ng binabawi

Ang adhika at ritmo nitong aking lahi

Tama na ang pakikibagay at pagkukunwari

Wagas na damdamin ay akin ng isisipi